محامي ضحية عصام صاصا: أسرة المتوفى رافضين الصلح ومش هيتنازلوا عن حقه | بث مباشر
كشف علي فايز محامي الضحية أحمد مفتاح، والذي لقي مصرعه في حادث دهس أعلى الطريق الدائري على يد عصام صاصا، تفاصيل المطالبة بالدية الشرعية من مطرب المهرجانات بعد تسببه في وفاة موكله.
حادث عصام صاصا
وقال محامي ضحية عصام صاصا: ليه موضوع الدية الشرعية ده عامل جدل مؤخرًا؟ دي دية شرعية وربنا سبحانه وتعالى قال عليها.. واللي خلاني أتكلم في الموضوع ده تصريحات زوجة عصام صاصا اللي قالت فيها إننا بنساومهم بالملايين.
وأضاف أن حديث زوجة مطرب المهرجانات عصام صاصا عن المساومة بملايين الجنيهات في حق موكله لا يصح تمامًا، كما أنه يسيء إلى أهلية المجني عليه لأنهم لم يفعلوا أبدًا مثلما ادعت عليهم في تصريحاته.
وتابع: أهل المجني عليه مساوموش في ملايين ولا اتكلموا في فلوس.. كل اللي عملوه إنه تقدموا بإدعاء مدني مؤقت بـ 5 مليون جنيه عن طريقي بصفتي المحامي بتاعهم.. وده مش معناه إننا هنتنازل بالعكس أنا هكمل في الإجراءات الجنائية.
وأوضح محامي ضحية عصام صاصا، أنه تلقى مكالمة هاتفية من مطرب المهرجانات الذي تحدث معه وأخبره أن مصيره لا يهمه وإنما يريد أن يراضي أسرة المجني عليه.
واستكمل: عصام صاصا قالي أنا مش فارق معايا أي حاجة المهم عندي أراضي الناس دي لأني حاسس بيهم لأن أبويا مات وأنا عندي 9 شهور.. وبلغت أسرة موكلي بالكلام ده اللي كان له تأثير شوية عليهم وهداهم.. ولكن هما رافضين الصلح ومش هيتنازلوا.
وأشار محامي ضحية عصام صاصا إلى أنه إذا لم يثبت تحليل المخدرات إيجابية عينة مطرب المهرجانات، كانت أسرة موكله ستتنازل عن القضية ولم يطالبوا بأي شيء، معلقًا: لو تحليل المخدرات مكنش طلع إيجابي أسرة الضحية مكانوش هيطلبوا حاجة وكانوا هيتنازلوا.. بس هما حسوا إن فيه استهتار بحق ابنهم اللي راح.. ومين قال إنهم عاوزين فلوس مقابل ابنهم!
