في ذكرى ميلاده.. محمد ممدوح: أتقبض عليا وأنا في فرح.. وبدأت التمثيل بسبب البنات
تحل اليوم ذكرى ميلاد الفنان محمد ممدوح الذي ولد بمدينة السالمية بدولة الكويت عام 1981 وانتقل بعدها مع أسرته إلى حي الحلمية الذي نشأ به في القاهرة.
محمد ممدوح يكشف تفاصيل دخوله التمثيل لأول مرة
وكشف الفنان محمد ممدوح الشهير بتايسون عن تفاصيل مهمة في بداية حياته في تصريحات تليفزيونية سابقة له قال فيها عن بداية دخوله التمثيل: بدأت تمثيل وأنا في تانية ثانوي بسبب البنات في مسرح المدرسة روحت هناك وأنا في المدرسة فكان جسمي ضخم شوية والمخرجة شافتني قالتلي عايزاك في دور فالموضوع عجبني عشان كان فيه بنات هناك وكده.
وأضاف الفنان محمد ممدوح: حاولت أدخل معهد سينما بس معرفتش ودخلت بعد كده فرقة وكنا بنعمل ورش تمثيل ودخلت ورش كتير أوي على نفقة الدولة مع مخرجين أجانب مخرج دنماركي ومخرج فرنسي وكنت بشتغل وأنا في الجامعة من ورا أهلي.
محمد ممدوح: أشتغلت شيف وقهوجي وفتحت كافيه
وتابع الفنان محمد ممدوح: واشتغلت حاجات كتيرة أوي غير التمثيل من ورا أهلي زي إني اشتغلت شيف قبل كده في مطعم شهير واشتغلت قهوجي وفتحت كافيه واشتغل جدا وكان بييجي يقعد عندي لاعيبة مشهورين في النادي الأهلي ونجحت في المشروع ده بس قفلت بعد كده بسبب الحي وأشتغلت كمان في فرقة أفراح وكان ليها قصة معايا وفي الفترة دي كنت بدأت تمثيل وبحاول أجرب الشخصيات.
محمد ممدوح يكشف تفاصيل القبض عليه
وأكمل الفنان محمد ممدوح في تصريحاته التليفزيونية: اشتغلت قبل كده في فرقة أفراح عندنا في المنطقة كانت الفرقة دي بتاعة صحابي وقولتلهم عايز اشتغل معاكوا وبالفعل نزلت معاهم شغل وروحنا أفراح وكنت بلعب على الدف، نزلت معهم 5 أفراح وفي الفرح الأخير اتقبض علينا، بسبب أن الفرح كان في منطقة شعبية وملوش تراخيص ولا أي حاجة وسهر زيادة عن اللزوم أوي وجه البوليس لم كل اللي في الفرح.
علاقة الفرقة التي عمل معها محمد ممدوح بفيلم شقو
وأضاف الفنان محمد ممدوح: الغريب إن أنا قابلت صاحبي اللي كان معايا في الفرقة اللي اتقبض علينا فيها دي في فيلم شقو، كان في مشهد في فيلم شقو في فرقة وكده وهو كان جاي مع الفرقة دي لأنه أصلا هو صاحب الفرقة اللي كنا شغالين فيها وقتها واخد الشغلانة وراثة من والده ولسة شغال بالفرقة لحد دلوقتي لكن شكله أتغير طبعا لما قبلته اتفاجئت بيه وماعرفتوش.
تفاصيل فيلم شقو
يذكر أن من آخر أعمال الفنان محمد ممدوح فيلم شقو الذي طرح في السينمات في بداية شهر أبريل الماضي 2024.
وتدور قصته حول مجموعة أصدقاء خارجين عن القانون يمارسون أعمالًا إجرامية ومشبوهة خارجة عن القانون، لكنها تقودهم إلى أزمات كبيرة وتحدث وراءها تبعات خطيرة وتتوالى الأحداث.
