بسمة وهبة استفزتني.. ميار الببلاوي: ندمانة إني طلعت في برنامج العرافة ومكنتش عاوزة الحلقة تتذاع | بث مباشر

ردت الإعلامية ميار الببلاوي على تصريحات الإعلامية بسمة وهبة الأخيرة، والتي علقت من خلالها على أزمتها الأخيرة مع أحد الشيوخ بعد الطعن في عرضها واتهامها بالزنا، وذلك فيما يتعلق بشأن تصريحاتها التي أفادت خلالها بعودتها لزوجها بعد طلاق 11 مرة.

أزمة ميار الببلاوي وأحد الشيوخ

وقالت ميار الببلاوي: أنا النهاردة لقيت الفيديو الخاص بـ بسمة وهبة وأنا بشكرها إنها طلعت وتكلمت والفيديو كان كله جميل.. وهي دافعت عني ونفت تمامًا إني جبت سيرة المحلل عشان أرجع لجوزي.

وواصلت: بس أنا عندي سؤال ليكي يا بسمة هو أنا عملتلك إيه؟ ليه يا حببتي الهجوم ده.. لما كلموني وقالوا لي إن بسمة عايزاني في برنامج العرافة فرحت جدًا لأني بحب بسمة وهبة في الله والبرنامج بتاعها معروف ومتشاف.

وأضافت ميار الببلاوي: أنا في أول الحلقة قولت لـ بسمة وهبة إني مش عاوزة أتكلم في حياتي الشخصية عشان الناس اللي بتقولي انتي اللي فتحتي على نفسك الكلام.. بس بسمة ساعتها تعصبت عليا وقالتلي اللي يقعد على الكرسي ده ميقولش حياتي الشخصية وأنا للأسف فقدت تركيزي من طريقتها الهجومية اللي خلتني مصدومة.

واستكملت: أنا لو عايزة أعمل تريند كنت اتكلمت وقولت من أول ما الحلقة نزلت بس سكت.. وأنا أصلًا وقت البرنامج وصلت لمرحلة إني قولت لـ رئيس التحرير إني مش عايزة الحلقة تتذاع لأني كنت مُستفزة طول الحلقة ومحبتش طريقة كلام بسمة معايا وقتها.

وأردفت ميار الببلاوي: أنا ندمانة إني روحت برنامج العرافة مش عشان خاطر كلام الشيخ اللي قاله عني.. لا أنا من وقت ما كنت خارجة من الحلقة وأنا ندمانة لأن بسمة كانت هجومية ومش بتديني فرصة أجاوب.