عايشين في عشة بوص من 23 سنة..مسنة أقصرية تستغيث:عاوزة حاجة تسترني وبناتي
استغاثت مسنة أقصرية من خلال القاهرة 24 بحاجتها الماسة إلى سكن يسترها ويأويها وخاصة مع دخول البرد وفصل الشتاء القارس والأمطار وهى تعيش هي وبناتها وصغارهم في أسرة تقارب الـ 11 شخصا في عشة من البوص على الطريق بمدينة الأقصر بلا سقف أو جدران وخاصة بعد ثقل الحمل بوفاة زوجها في شهر رمضان الماضي.
عايشين في عشة بلا سقف من 23 سنة
وقالت مناعية عبد القادر على 70 سنة لـ القاهرة 24: أعيش في تلك العشة على الطريق من 23 سنة وبعد وفاة زوجى المرحوم محمد ابو المجد بلال والذي كان يعمل خفيرا في تلك الأرض في شهر رمضان الماضي ولاد الحلال أصحاب الأرض سمحولنا نقعد نحرسها.
450 جنيها يعملوا أيه؟
و أضافت مناعية: الحمل تقل عليا بعد وفاة زوجى وكل اللي بتحصل علية 450 جنيها طب يعملوا ايه في الزمن ده، وزي ما شايفين العشة من البوص لا سقف ولا جدران واشتريت التلاجة خردة عطلانه علشان أعملها نملية ولا في دولاب ولا حتى سراير والحمد لله على كل حال.
و قالت مناعية: فرشتنا حتة المرتبة القديمة دي اللي قدامك بنفرشها على الأرض كلنا وننام جنب بعض انا وبناتي وعيالهم واهي اللي تزعل فيهم من جوزها تقعد معايا ومرات ولدي بعيالها ال5 قاعدين معايا بعد ما الواد طفش.
و أضافت مناعية: لما ييجي البرد والمطر كلنا بنكمش وبنتخبى تحت البطاطين القديمة دي هنروح فين يا ولدي، حتى ما عندينا بوتاجاز وشغالين بالكانون نار وحطب، وطشت بنغسل فيه ونستحمى فيه، ومطبخنا حتة القفص اللي قدامك دي.
عاوزين بيت يسترنا
و أوضحت مناعية: كل اللي بنتمناة من ولاد الحلال سكن كريم ولائق و4 حيطان وسقف يسترني انا وبناتي وعيالهم من برد الايام وعيون اللئام انا دلوقتي كبرت 70 سنة وخايفة عليهم والعمر مبقاش فية خلاص.
و قالت ثناء سمرى زوجة إبن الحاجة مناعية: جوزى سابنا وطفش بعد ما الحمل زاد وبقيت أنا وعيالي ال5 عايشين مع الحاجة مناعية في العشة البوص اللي شايفين حالها دي، والعيال طلعتهم من المدارس من القلة.
فارشة بخضار على الطريق علشان نعيش
و أضافت زوجة الإبن: علشان الاقى لقمة اتغلب بيها على ظروف الحياة وأكل عيالي بفرش ببيع خضرة جرجير وبقدونس وشبت وكسبرة وكل اللي عاوزاة استر بناتي اللي على وش جواز، ومحتاجين بيت يسترنا ياريت حد يحس بينا ويسمعنا وبيجي يشوف حالنا.
